بعد أن أقسمت حكومة المهندس شريف إسماعيل، اليمين الدستورية أمام الرئيس المصري عبد الفتاح السيسي، وجد النشطاء على مواقع التواصل الاجتماعي في "خواطر" وتدوينات وزير التعليم الجديد، الدكتور الهلالي الشربيني، على حساب منسوب له في فيس بوك مادة دسمة للهجوم عليه.
فقد ضجت هذه المواقع بصور لمشاركات الشربيني قبل أن يصبح وزيراً، حيث وُجد فيها الكثير من الأخطاء الإملائية، وكلام آخر اعتبر المغردون أنه لا يجب أن يخرج عن شخص بمستوى وزير.
كما نشر الحساب المنسوب على "فيس بوك" صورة للدفاع عن ضباط الجيش والشرطة، مكتوبا عليها: "في الوقت اللي حضرتك بتدفيها.. هوه واقف بيحميها"، فسخر من البوست عمر وهدان قائلا: "وزير التربية والتعليم إحنا داخلين مرحلة صدرها للى يقدرها".
فيما نشر محمد سنجر تدوينة منسوبة لوزير التعليم منذ 2014، وقال فيها: "تعرف قيمة الذوجة الصالحة ويتحدد معدنها إذا الدنيا عن (ذوجها) أدبرت ومصائب الدنيا عليه أقبلت وتناوبت"، وعلق أحد المستخدمين قائلا: "الوزير مُصر إنه يكتب كلام غلط".
وفيما يلي بعض التعليقات الأخرى حول تدوينات وزير التعليم.
فقد قالت @sanaa_Ga: "انتظروا قريبا .. #وزير_التعليم يؤكد أن حسابه على فيس بوك تم اختراقه عن طريق الإخوان وقاموا بعمل أخطاء إملائية في كل المنشورات على صفحته.
"أما @MouhamedAttia فكتب: "إيه رأيكو نعمل امتحان إملاء بين #وزير_التعليم الجديد ومريم ملاك ؟؟".
@magdymohamed_ علق قائلاً: "مهرجان #وزير_التعليم ازاي ازاي ازاي أوصفلك يا حبيبي ازاي قبل ما احبك كنت ازاي".
وانفعل وزير التربية والتعليم والتعليم الفني، على الإعلامي رامي رضوان، المذيع بقناة "TEN"، بعدما وجه له سؤالا حول "كتاباته على فيس بوك".
وقال "رضوان" للوزير، أمس السبت: "النهاردة الناس على المواقع الاجتماعية شيروا بوستات ليك فيها أخطاء إملائية"، فقاطعه الوزير أثناء إجراء مداخلة هاتفية، قائلا: "لا إله إلا الله، يا أخي الفاضل ناس كتير اتصلوا بيا وكلموني، وأنا بشتغل من ساعة ما دخلت الوزارة، وأقسملك بالله ولا فتحت فيس بوك، ومعرفش بتتكلم على إيه".
فقال "رضوان": "سيادتك أنا بقولك اللي حصل أهو، والناس بتشير بوستات قديمة لحضرتك مش وليدة اللحظة أشعار وخواطر وبيقولوا حضرتك قفلت الصفحة دلوقتي"، فرد عليه الوزير، قائلا: "يا سيدي أنا صادق في اللي بقوله، وبالفعل مشفتش حاجة من اللي بيتقال عني، من فضلك لما أشوفه الأول هبقى أرد".
وأضاف "رضوان": "مش عارف حضرتك متعصب ليه، المسيرة لسه طويلة، البوستات دي بقولها لحضرتك علشان الناس بتتكلم عليها، وبغض النظر حضرتك قفلت الصفحة واللا لا؟"، فرد الوزير: "من فضلك لما أشوفه وحضرتك لما هتسألني هرد عليك، وكل اللي بتسألني فيه هرد عليك، إحنا جايين علشان نشتغل بس".
